LAOAG CITY – Madanagan ti Philippine Coast Guard (PCG) kalpasan a nakita ti presensia ti maysa a barko ti Chinese Coast Guard (CCG) a dinakamat kas CCG 5901 nga adda iti asideg ti Exclusive Economic Zone (EEZ) ti Pilipinas.
Daytoy a barko nga am-ammo kas ‘monster ship’ gapu iti kinadakkelna a 12 a ribu tonelada a mamin-lima a daras a dakdakkel iti kadakkelan a barko ti Philippine Coast Guard ket na-detect manipud iti 54 nautical miles iti lugar ti Capones Island idiay Zambales.
Babaen ti Dark Vessel Detection System ti Canada, kinumpirmaran ti Philippine Coast Guard ti nakita a barko ti China idi Sabado ti rabii, dagus met nga inpatulod ti Philippine Coast Guard ti BRP Cabra, maysa nga helicopter ken ti Philippine Coast Guard Caravan tapno mabantayan ti nasao a barko.
Ti barko ti China Coast Guard nga immuna a naipadamag nga adda iti asideg ti Scarborough Shoal (Bajo de Masinloc) ket nakita met nga agturturong nga agpa-laud ken naudi a nakita iti 85 nautical miles manipud idiay Zambales.
Inpetteng ti Philippine Coast Guard a ti presensia ti barko ti China iti uneg ti Exclusive Economic Zone ti Pilipinas ket maysa a karit iti soberania ti Pilipinas.
Inlawlawag dagiti otoridad ti Pilipinas ti inkarida a protektaran dagiti mangngalap a Pilipino nga agop-operar iti kabaybayan ken siguradoen ti kinatalge ken access iti kabaybayan ti Pilipinas nga awan ti harassment.
