LAOAG CITY – Target ti House prosecutors a malpas iti umuna wenno maikadwa a lawas ti Oktubre ti presentasyon dagiti ebidensya kontra ken ni Vice President Sara Duterte mainaig ti maipagarop a saan a mailawlawag a kinabaknang na.
Segun ken ni Bicol Saro Party-list Representative Terry Ridon, karaman iti pinal nga iskedyul ti posibilidad a saan nga awaten ti depensa ti 104 requests for admission nga inpila ti prosecution.
Kuna ni Ridon a mabalin a saanen a paawagan ti amin a testigo nga adda iti listaan da no makita nga umdasen ti dagiti dokumento a maipakita iti impeachment court.
Karaman kadagiti kangrunaan nga ebidensya nga isagsagana ti prosecution dagiti bank ken tax records nga adda ti pakainaigan ni Duterte, ti asawa na ken dagiti kukua da a kumpanya.
Kalpasan ti presentasyon iti unexplained wealth, inrakurak ni Ridon nga isaruno a dagus ti prosecution dagiti ebidensya para iti kaso a bribery wenno ileppas ti nabatbati pay a paset ti presentasyon.
Agtalek ti sibubukel a prosecution team a makumpleto da amin dagiti kasapulan a dokumento ken dagiti testigo sakbay iti aldaw ti Lunes.
