LAOAG CITY – Inbilin ni Presidente Ferdinand “Bongbong” Marcos Jr. ti panangala ti ad-ado nga school counselors kadagiti pampubliko a pagadalan iti baet ti umad-ado a kaso ti bullying ken problema nga adda ti pakainaigan iti mental health dagiti estudyante.
Iti panagbitla ni Presidente Marcos iti maikapat nga State of the Nation Address (SONA) na, inpetteng na ti maipapan iti emosyonal a problema nga agtultuloy a sagsangwen ti ado nga estudyante a rumbeng a solusyunan ti gobierno kagiddan ti traditional academic interventions.
Immunan nga inrakurak ti Department of Education ti panagkurkurang dagiti counselor iti pagadalan iti panangsuporta iti pagsayaatan dagiti agad-adal.
Inrakurak ni Presidente Marcos a tapno masolusyunan ti problema ket nayunan ti Department of Education ti bilang dagiti school counselor nga agserbi a support system ken first responder para kadagiti estudyante nga agparparikot.
Ti panawagan ni Marcos ket senyales a kasapulan a masolusyunan a dagus daytoy iti baet ti naiget a panagamak ti publiko kadagiti insidente ti student suicide, kinadamsak iti uneg ti pagadalan ken ti online harassment.
Saan met pay a dinakamat ti administrasyon no mano a baro a posisyon ti counselor ti maparnuay wenno kaanu a mangrugi ti hiring.
