LAOAG CITY – Indeklarar ni Presidente Ferdinand Marcos Jr. kas “Dekada ng Kasaysayan ng Pilipinas” ti 2023 agingga iti 2033.
Inaramid daytoy ni Presidente Marcos kagiddan ti panangselebrar ti National Historical Commission of the Philippines (NHCP) ti centennial anniversary iti Oktubre 2023.
Iti bileg ti Proclamation 386 a pinirmaan ni Presidente Marcos idi Nobyembre 7, nailanad ditoy a makikaysa ti intero a pagilyan iti National Historical Commission of the Philippines iti panangselebrar ti milestone iti burukrasya ti Pilipinas ken ipapaayan ti importansya ti papel iti pakasaritaan ti pannabuwangay ti pagilyan.
Naipalaon pay iti nasao a proklamasyon a maibilbilin iti National Historical Commission of the Philippines a mangidaulo, makitinnulong ken iwanwan ti panangobserbar ti “Dekada ng Kasaysayan ng Pilipinas” kasta pay iti panangidatag kadagiti programa, proyekto ken dagiti aktibidad para iti nasao a selebrasyon.
Maim-imbitaran pay ti amin nga ahensya ken instrumentalities ti gobierno a pakairamanan ti government-owned or -controlled corporations, government financial institutions, state universities and colleges, LGUs, National Government Organizations ken pribado a sektor a suportaran ti National Historical Commission of the Philippines ken makipagpaset iti panangobserbar ti nasao nga okasyon.
Naituding a selebraran ti National Historical Commission of the Philippines ti maika-100 nga anibersaryo ti pannakabuwangay daytoy intono Oktubre 23, 2033.
