LAOAG CITY – Inbatad ni Presidente Ferdinand Marcos Jr. a dandanin maipatungpal ti pannakaipangato ti minimum wage iti pagilyan tapno masigurado ti proteksyon dagiti mangmangged manipod iti “rapid expansion” ti ekonomiya.
Daytoy ket basar iti Presidential Communications Office kalpasan ti panag-courtesy call iti Malacañang ni International Labor Organization director general Gilbert F. Houngbo.
Segun ken ni Marcos, nakitaripnong ti administrasyon iti panangidaulo ti Department of Labor and Employment (DOLE), kadagiti mangmangged ken labor unions ken organizations tapno mabalanse ken ikkaten ti “inflationary pressures” kadagiti mangmangged.
Inrakurak ti Presidential Communications Office nga iti agdama a minimum wage iti Pilipinas ket umab-abot iti P372 ken P470, depende iti rehiyon.
Inpakaaammo ti Department of Labor and Employment nga idi Mayo ket adda ti 10 wage hike petitions ngem pending paylaeng ken ad-adalen a naimbag ti nagduduma a Regional Tripartite Wages and Productivity Boards (RTWPBs).
Kuna ni Labor Secretary Bienvenido Laguesma, ipresentar ti Department of Labor and Employment ken Marcos, ken iti dadduma pay a Cabinet members ti Philippine Development Plan 2020-2023 sakbay a mangipatungpal ti national tripartite conference.
Inpetteng met ni Marcos a mabalin a maapektaran ti rapid industrialization ken panagdur-as ti ekonomiya iti labor sector.
Innayon na a nasurok a 96% dagiti negosyo iti Pilipinas ket babassit wenno “nano-enterprises.”
Immunan nga inpalgak ni Finance Secretary Benjamin Diokno idi Mayo ita a tawen a ti pannakaipangato ti minimum wage iti P150 iti intero a Pilipinas ket mangpangato ti inflation ti 1.4 percentage points.
Mainaig iti daytoy, inpasigurado ti presidente kadagiti napukawan ti trabaho idi kangitingitan ti pandemya nga adda ti programa ti Department of Labor and Employment para kadakuada.
