LAOAG CITY – Saan a mangiyus-uswat ti “ala-tokhang way” nga imbestigasyon ni Presidente Ferdinand Marcos Jr.
Daytoy ti nagbalin a sungbat ni Palace Press Officer USec. Claire Castro iti nagbalin a banat ni Vice President Sara Duterte no pudno a seryoso ni Presidente Marcos a mangsolbar ti flood control anomalies a maipagarop a kabaelanna nga establisaren iti uneg ti maysa nga aldaw dagiti karaman iti korapsyon.
Segun ken ni Castro, respetaren ni Presidente Marcos ti due process.
Inlawlawag pay ti Palace Official a ti maisaysayangkat nga imbestigasyon ket para iti umili ken saan a panagpulitika.
Innayon na nga ar-aramiden daytoy ti presidente uray matamaan pay ti administrasyon na ken dagiti nasingeg a pagayam na.
Inpasagid met ni Castro nga uray inbutaktak idin ni dati a Presidente Rodrigo Duterte ti panagraira ti ghost projects iti administrasyon na ket awan ti inaramid na tapno mapagsungbat dagiti opisyal a karaman kadagiti maanomalya a proyekto.
