LAOAG CITY – Awan ti inpaay a komento ti Palasyo ti Malakanyang partikular ni Presidente Ferdinand Marcos Jr., mainaig iti nagbalin a taripnong da US President Donald Trump ken Ukraine President Volodomyr Zelensky a nakakigtotan ti intero a lubong a nagtungpal iti nabara a panagsarita.
Segun kenni Palace Press Officer USec. Claire Castro, awan ti aniaman a reaksiyon ni Presidente Marcos mainaig iti daytoy a banag.
Inbatad ni Castro nga ipabus-oy laengen ti Malakanyang kenni Department of Foreign Affairs (DFA) Secretary Enrique Manalo iti panangipaay ti rakurak seknan iti nagbalin a taripnong da Trump ken Zelensky.
Maipalagip a saan a naurnus ti panagsarita da Trump ken Zelensky iti Oval Office.
Daytoy ket kalpasan a binalakadan ni Trump ni Zelensky a makinegosyaren iti Russia tapno malpasen ti giyera iti nagbaetan ti Ukraine.
