LAOAG CITY – Saanen a pinatulan pay ni Presidente Ferdinand Marcos Jr. dagiti akusasion ni dati nga Ako Bicol Party list Representative Zaldy Co kontra kenkuana mainaig iti P100 billion a gatad a maipagarup ti insertions iti 2025 national budget.
Iti panagbisitana kadagiti naapektaran ti napalabas a bagyo idiay Negros Occidental, nasaludsod ti Presidente iti komentona mainaig kadagiti nagbalin nga akusasion ti dati nga agpanpanday linteg.
Maipalagip iti umuna a video nga inruar ni Co, inbutaktakna nga inbilin mismo ti Presidente ti panangisingit ti P100 bilyon a gatad ti proyekto iti babaen ti bicam.
Iti maikadua a video nga inruar ni Co, nangiruar isuna kadagiti ladawan dagiti adu a maleta a maipagarup a naglaon ti kuarta nga inpatulodna mismo kaduana ti staff ken security guards-na iti pagtaengan ti Presidente ken ni dati nga House Speaker Martin Romualdez.
Nakaawat ti Presidente ti 25% manipud iti maipagarup nga insertions a katukad ti P25 billion.
Immuna iti daytoy, naglikudan ni Presidential Communications Office (PCO) Secretary Dave Gomez ti Part 2 video statement ni Co nga awan ti pangibasaran ken sayangguseng.
Inpetteng ni Gomez ti takder ti Palasyo a kumarkarit ken ni Co nga agawid ditoy Pilipinas, pirmaan ti salaysayna, pagsapataen daytoy ken sangoen dagiti akusasion kenkuana.
