LAOAG CITY – Sinertipikaran kas urgent ni Presidente Ferdinand Marcos Jr. ti pannakaipasa ti House Bill 10800 wenno ti 2025 General Appropriation Act (GAA) a mangipaay ti P6.532 trillion national budget para iti sumaruno a tawen.
Inbatad ni House Speaker Martin Romualdez a kalikagom a masigurado ni Presidente Marcos a saan nga agbalin a lapped ti budget kadagiti kritikal a trabaho ti gobierno.
Ti nasao a mensahe ket inbasa ni Romualdez iti plenary session kalpasan ti agtultuloy a pannakatratar ti budget iti nagduduma nga ahensya ti gobyerno.
Immunan nga inbatad ni Romualdez a plano nti kamara de representantes nga aprubaran iti maikatlo ken maudi a pannakaibasa ti nailungalong a 2025 General Appropriation Act intono Setyembre 25 ita a tawen.
Ti proposed 2025 budget ket 9.5 percent a nangatngato no ikumpara ita a tawen nga agbalor ti P5.268 trillion.
