LAOAG CITY – Maladingitan ni Presidente Ferdinand Marcos Jr. iti panagbitlana idi kalman maipanggep iti Online Sexual Abuse and Exploitation of Children (OSAEC) Summit 2024 kalpasan nga inyestoriana ti maysa nga indibidual a nakalasat iti kapadasanna seknan iti seksual a pannakaabuso.
Segun iti Presidente, ti panangabuso kadagiti ubbing ket “worst crime against humanity” isu a siguradoen ti gobierno a saan a ma-tolerate daytoy a klase ti krimen.
Inpasingked ti Presidente a nasken nga agtrabaho a naimbag dagiti opisial gapu ta adu pay ti masapol nga aramiden tapno agpatingga ti nakaam-amak a parikot nangruna kadagiti agtutubo.
Inpannakkel ni Marcos ti sumagmamano a programa ti gobierno kas iti pannakaipasdek ti Presidential Office for Child Protection ken pannakaipaulog ti Anti-Online Sexual Abuse and Exploitation of Children and Anti-Child Sexual Abuse or Exploitation Materials (CSAEM) Act.
Kabayatanna, maibasar iti datos manipud iti Department of the Interior and Local Government (DILG) manipud Enero agingga iti Setiembre, umabot iti 169 a biktima ti online sexual abuse ken exploitation ti naisalakan manipud iti agarup 100 nga operasion ditoy pagilian.
