LAOAG CITY – Inlawlawag ni Mrs. Avelina Fe Carlos Camacho, Presidente ti Barangay Association of Senior Citizens Affairs iti Barangay Santo Cristo 1 iti ili ti Bacarra a saan a nagaraw ti pundo iti asosasionda kadagiti naisayangkat nga aktibidad iti barangayda.
Segun kenkuana, adda ti nakolektarda a quota ken donasion para iti pannakaisayangkat ti Poging Lolo and Gandang Lola isut gapuna a saan pulos a nakaut ti pundo iti asosasionda.
Malaksid iti daytoy, kunana a binulodna pay laeng ti 10 a porsiento ti ur-or dagiti collector ti asosasionda tapno isu ti mausar a pangsupusop kadagiti magastos kadagiti maiyuswat nga aktibidad iti asosasionda.
Inpasingkedna met nga isublina daytoy apaman a maurnos amin dagiti koleksionda.
Inbatadna nga amin a koleksion ti asosasionda ket adda iti bangko rason a saan a kaskarina a mairuar daytoy ken masapul a mapagnunumoanda nga umuna a naimbag kadagiti padana nga opisial ti asosasion.
Inlawlawagna a dagiti agkolkolektar ti nakasarsaritana a saan ketdi a dagiti miembro iti asosasionda a posible a nangitunda ti saanda a panagkikinnaawatan iti pannakaibusbos ti nakolektar a kuarta ti asosasionda.
Immuna iti daytoy, adda ti naawat a reklamo ti Bombo Radyo Laoag babaen ti ipa-Bombo segment a maipagarup nga ad-adu metten ti nagastos a kuarta ngem ti nakolektar ti Barangay Association of Senior Citizens Affairs iti Barangay Santo Cristo 1 iti ili ti Bacarra.
