LAOAG CITY – Mangrugrugin a marikna ti bunga dagiti nagbanbannogan ni Gob. Matthew Marcos Manotoc kangrunaanna iti panagawis kadagiti negosiante nga umay agnegosio ditoy probinsia.
Daytoy ti inpakaammo ni Ms. Rhona Leigh Bueno, mangidadaulo ti Investment Office ti gobierno probinsial ti Ilocos Norte kalpasan ti ibibisita ni Mr. Hyun Chong (Joseph) Um, Presidente ti Korean Chamber of Commerce Philippines, Inc. ditoy probinsia.
Inlawlawagna a naaddaan ti koneksion ni Pres. Um iti Ilocos Norte kalpasan a nakipagkita ti gobernador iti nadumaduma a grupo dagiti negosiante ken Chamber of Commerce ditoy Pilipinas iti maudi a tallo a bulan ti tawen 2022 tapno itandudona a napintas ti probinsia a pangipalawaan wenno pangipasdekan dagitoy ti negosio.
Mainaig iti daytoy, kunana nga iti tulong ti opisinada ket naibirukanda iti local a kompania a mabalin a makisosyo iti kompania ni Pres. Um a maysa a Business Process Outsourcing Company.
Inbatadna a ti kompania ditoy probinsia a kasosyo ti kompania ni Pres. Um ken ti Avion.
Kunana a daytoy ti nangitunda iti pannakaipalawa iti Korea ken Japan a maserbian ti Avion rason nga iti agdama ket agkasapulanda ti nayun nga empleadoda.
Mainaig iti daytoy, inawis ni Pres. Um dagiti kasosyo na a kompania idiay Korea ken Japan a mangidiaya iti Korean Language kadagiti pagadalan ditoy probinsia.
Innayonna ni Bueno a maysa kadagiti kangrunaan a rinanta ni Um ditoy Ilocos Norte malaksid iti panangiyam-ammona kadagiti kasosyo na manipud Japan ken Korea iti kasosyona ditoy probinsia ket ti pannakapirma ti Memorandum of Understanding para iti Korean Language iti Mariano Marcos State University.
