LAOAG CITY – Nagpanawagan ti Malakanyang iti media nga agbalin a responsbale iti panangipadamag kadagiti insidente ti pammaltog kadagiti pagadalan.
Segun ken ni Palace Press Officer Usec. Claire Castro, nasken a liklikan ti panagiwaras dagiti detalye a mabalin a mangitunda ti panagtulad wenno copycat acts.
Inpetteng pay ni Castro a rumbeng nga isuro kadagiti ubbing ti umno a panagug-ugali, panagdayaw ken napintas a pannakikadua kadagiti kapadada nga estudiante ken kadagiti manursuro.
Ti nagbalin a panawagan ni Castro ket kalpasan ti agsina nga insidente ti pammaltog iti maysa a pagadalan iti Tacloban ken Ateneo de Zamboanga.
Mainaig iti daytoy, kiniddaw ti Malakanyang dagiti kameng ti media a protektaran ti dayaw, kinatalged ken privacy dagiti menor de edad, pakairamanan pay dagiti maseknan a nagannak a nagpasina ken ti agtultuloy nga imbestigasion kadagiti nasao nga insidente.
Kabayatanna, pinaiget ti Department of Education (DepEd) ti kintalged dagiti pagadalan kalpasan ti insidente iti Tacloban ken ti baro nga insidente iti Zamboanga.
