LAOAG CITY – Umanabot iti 28 wenno katukag ti 24% manipud iti 173 a Stock Keeping Units (SKUs) ti school supplies ti nakitaan ti Department of Trade and Industry (DTI) Pangasinan a ngimmato ti presio.
Segun ken ni Natalia Dalaten, Provincial Head ti nadakamat nga ahensia, inpakaammona a a basar iti panangmonitor-da, nairekord ti panagngato ti school supplies a manipud 1% agingga iti 25% manipud iti orihinal a presioda.
Nupay kasta, kinunana nga adu dagiti school supplies a saan a nangipangato ti presioda ken nagtalinaed a natalged ti panaglako kadagiti merkado.
Kinunana a karaman kadagiti school supplies a bantayan da ket dagiti notebook, pad paper, lapis ken ballpen, coloring sticks, eraser, pangtahar ken ruler.
Kabayatanna, binalakadanna ti publiko, partikular dagiti nagannak, nga agbalinda a kritikal iti panaggatang kadagiti school supplies para kadagiti annakda.
