LAOAG CITY – Inbatad ni Miss Jena Narciso, maysa kadagiti aglaklako iti merkado publiko ditoy ciudad ti Laoag a naipangaton ti presyo dagiti ilaklako da a prutas ita nga aldaw agingga intono bigat disyembre 31 a bisperas ti baro a tawen.
Kuna na nga adda pay dagiti nakabasket a nagbubukel a prutas nga ilaklako da nga agbalor ti 350 agingga iti 500 a pisos, depende iti klase da.
Segun kenkuana, sumagmamano nga aldaw sakbay ti panangsarabo ti baro a tawen ket adon dagiti nagpareserba ti prutas kadakuada.
Innayon na a ti kangrunaan a naganar a prutas ita a bisperas ti baro a tawen ket dagiti babassit a nagbubukel kas ti ponkan, mansanas ken dadduma pay.
Patien ni Narciso a malako da amin nga inangkat da a prutas agingga intono bigat gapu iti kaado dagiti mapan aggatang, aglalo ket dagitoy ti maysa kadagiti kangrunaan a maidasar iti lamisaan iti panangsarabo ti baro a tawen.
Mainaig iti daytoy, inrakurak ni Narciso a ti kanginaan a prutas nga ilaklako da ket ti guyabano nga agbalor ti 200 a pisos.
