LAOAG CITY – Kinumpirmaran ni Mr. Dominador Alberto, Consumer Protection Division ti Department of Trade and Industry (DTI) ditoy probinsya a namin-adon a daras a ngimmato ti presyo ti asukar.
Segun keno Alberto, manipud Abril 6 agingga iti Hunyo 23 ket 20 a pisos ti nagngatoan ti presyo iti kada kilo ti asukar.
Kunana nga iti monitoring da, idi Abril 6 ket 68 a pisos laeng ti presyo ti kada kilo ti asukar, ngimmato daytoy idi Abril 21 agingga iti 70 a pisos agingga iti Mayo, ken idi Hunyo 3 ket nagbalin a 72 a pisos ken iti agdama ket 90 a pisos iti kada kilo.
Inbatad na nga iti panagmonitor da ket saan nga agpapada ti presyo gapo ta adda dagiti sumagmamano a pagtagilakoan a ti presyo da iti kada kilo ti asukar ket 85 a pisos agingga iti 87 a pisos.
Mainaig iti daytoy, kunana a ti monitoring da iti presyo dagiti nagduduma a produksyto kangrunaan na kadagiti agricultural products ket mamindua iti kada bulan.
Kabayatanna, kunana a karaman kadagiti imonmonitor da ti presyo na ket ti NFA rice, imported ken local commercial rice, ikan, livestocks and poultry, nateng ken cooking oil.
