LAOAG CITY – Ngumato ti dakkel nga aksaw ti presyo dagiti produkto ti petrolyo ita a Martes, Setiembre 15, kalpasan ti agtultuloy a panaggaraw ti presyo ti langis iti global market.
Manamnama a marikna dagiti motorista ti kanayunan a presyo iti gasolina, diesel ken kerosene a mabalin pay a mangitunda ti panagngato ti gastos iti transportasion ken kadagiti dadduma pay a serbisio.
Basar iti Department of Energy (DOE), manamnama a mabalin nga umabot iti P5.68 iti kada litro ti kanayunan a presyo ti gasolina.
Iti met diesel, manamnama a ngumato daytoy iti P4.31 iti kada litro, ken idinto a P4.62 met iti kada litro ti pagngatoan ti presyo ti kerosene.
Gapu iti daytoy, posible a manayunan ti gastos dagiti motorista ken kadagiti nagduduma a negosyo, aglalo kadagiti nakadependar iti gasolina ken diesel para iti inaldaw nga operasionda.
