LAOG CITY – Inlawlawag ni Mrs. Norma Lagmay, ti Provincial Agriculturist ditoy probinsya nga adda ti maikanatad a presyo dagiti mailaklako nga irik.
Inbaga na a mabalin a mailako iti kada kilo nga irik iti P15.50 no daytoy ket 1st class; 14 a pisos ti 2nd class idinto a ti reject ken agay-ayam iti 7-10 a pisos iti kada kilo.
Kuna na a ti maibagbaga a 14 a pisos iti kada kilo ti irik ket isu daytoy dagiti irik a saan pay a pulos a nabilag wenno naggapo pay laeng iti paggapasan.
Inpasigurado ni Lagmay a no mailako ti irik iti 14 a pisos iti kada kilo ket makaganansya pay laeng dagiti mannalon no sadinno nga adda pay ti maipatong nga 4 a pisos a drying fee.
Innayon na nga a dagiti inbunong ti gobierno a libre a bin-i ken abono kadagiti mannalon ket mainayun pay iti ganansya dagiti maseknan.
Kabayatanna, inpakaammo ni Lagmay nga agur-uray ti National Food Authority (NFA) ditoy probinsya kadagiti mapan agilako iti apit da nga irik ngem masapol a dagitoy ket nabilag a nasayaat ken nadalos.
