LAOAG CITY – Kinumpirmaran ni Mr. Dominador Alberto, iti Department of Trade and Industry ditoy probinsya a naipatungpalen ti price freeze kageddan ti pannakaideklara ti state of calamity ditoy probinsya.
Pinakaammoan ni Alberto dagiti kangrunaan nga establisimiyento ditoy siudad ti Laoag, iti ili ti San Nicolas ken iti siudad ti Batac seknan ti advisory manipud iti DTI ken dagiti listaan dagiti produkto nga adda iti babaen ti price freeze.
Segun kenni Alberto, dagiti maibilang a basic neccesities ti adda iti babaen ti price freeze kas iti bagas, mais, mantika, itlog, de lata, kape, bread, ken dadduma pay a produkto.
Inbatad na a makaumanay dagiti produkto dagiti agop-operar a pagtagilakoan kabayatan ti implementasyon ti enhanced community quarantine gapu ti pangta ti coronavirus disease.
Inpakaammo na a ti gagangay a panaggatang ti publiko ket makaumanay ti buffer stock dagiti grocery iti 60 nga aldaw.
Ngem gapu ti panagbuteng dagiti tattao iti COVID-19 ken ti naipatungpal nga enhanced community quarantine ket umanay laeng ti buffer stock dagiti grocery iti nakurang a maysa a bulan.
Inbatad ni Alberto nga inpasigurado dagiti dadduma a groserya nga agtultuloy nga adda ti suplay da.
