LAOAG CITY – Inbatad ni Mrs. Janet London, mangidadaulo ti Gender and Development Office a manamnama a maiyuswat ti kaunaan a Pride Parade inton Hunio.
Segun kenkuana, adda iti naiwayat a meeting pakairamanan iti LGBTQ, Municipal Population Workers and Officers ken ni Sangguniang Panlalawigan Hon. Portia Salenda ditoy probinsia.
Mainaiag iti daytoy ni Hon. Salenda ti nagbalin nga organizer iti nasao nga aktibidad a manamnama a maiwayat inton Hunio 29.
Inpakaammo ni Mrs. London a mangrugi ti parada iti sanguanan ti Centennial Arena agingga iti sango ti Kapitolyo Probinisial ditoy probinsia.
Innayonna a nakitinnulong daytoy iti maysa nga ospital ditoy probinsia nga addaan ti maipan a booth para iti Human Immunodeficiency Virus screening a maipaay kadagiti LGBTQ ngem saan daytoy nga inkapilitan.
Kabayatanna, inpalgakna a ti nadakamat a programa ket mangted ti gundaway para kadagiti LGBTQ nga ipakita dagiti karbengan da gapu ta dakkel ti maitulongda iti panagdur-as iti ekonomiya.
