LAOAG CITY – Inpakaammo ni Mayor Remigio Medrano iti ili ti Sarrat ti pannakalukat ti baro a Primary Care Facility ti Rural Health Unit (RHU) para kadagiti pasyente a kasapulan ti panag-check-up dagiti residente iti nasao nga ili.
Nupay operational ti nasao a pasilidad, inlawlawag na a saan pay a mabalin nga usaren amin a serbisyo a nairaman iti daytoy agsipud ta adda pay laeng dagiti maiyur-uray a lisensia.
Kinunana, tunggal serbisio a kasapulan nga aramiden wenno ipaay ti pasilidad ket masapul nga umuna nga ikkidaw wenno aprobaran ti Department of Health (DOH).
Nupay kasta, adda ti araramiden nga addang ti Rural Health Unit ken ti lokal a gobierno ti Sarrat tapno mausar ken mapadasan dagiti dadduma serbisio a mabalin a ma-access ti publiko, pakairamanan dagiti Dialysis equipment, Diagnostic Facility, X-ray services, ken dadduma pay a serbisio ti salun-at.
Kabayatanna, kiniddaw ti mayor dagiti umili nga agbalin a mannakaawat bayat ti panangasikasoda kadagiti lisensia ken manamnama nga inton sumaruno a bulan ket makompleto amin dagiti kasapulan a permit wenno license to operate tapno mausar ti pasilidad ken mabenepisiaran dagiti umili.
