LAOAG CITY – Bimmaban iti pwesto ni Prime Minister KP Sharma Oli iti Nepal gapu iti kumarkaro nga anti-corruption protests.
Gapu iti nakaro a pungtot dagiti protesters ket pinuuran da ti balay ti prime minister ken dagiti tallo pay a ministers a nangitunda ti panagbaba da iti pwesto.
Nakapungtot dagiti protesters kalpasan nga inpawil ti gobierno ti social media tapno malapdan ti kampanya kontra iti korapsyon iti nadakamat a pagilian.
Mainaig iti daytoy, umabot iti 19 a tattao ti natay iti engkwentro a napasamak iti nagbaetan dagiti protesters ken dagiti otoridad idiay Nepal.
Nagusar ti tear gas ken rubber bullets dagiti otoridad gapu iti pananggandat a panangatake dagiti protesters iti parliament building.
Malaksid kadagiti natay ket adda pay ti agarup 100 a tattao a pakairamanan dagiti pulis ti nagsagaba ti sugat gapu iti insidente.
