LAOAG CITY – Nakaunget ni Mrs. Cecilia Antonio, School Principal IV ti Shamrock Elementary School ditoy siudad ti Laoag, kalpasan nga adda dagiti nakumpiskarda a syringe nga ayayam dagti estudiante iti nadakamat a pagadalan.
Segun kekuana, dagosda a nagturong iti maysa a paglakoan iti likod ti pagadalan no sadinno naduktalanda nga ilaklakoda ti syringe iti P15.
Ibilang ni Antonio a risgo kadagiti estudiante dagiti ayayam a mailaklako nga adda kaduana a syringe agsipud ta mabalin daytoy a makadunor.
Gapu iti daytoy, nagpaayab ni Antonio iti biang ti Licensing Office iti lokal a gobierno ditoy siudad tapnu maduktalan nu adda ti permit a mailako ti ayayam.
Nammoan a namin-dua a naballaagan ti paglakoan nga saanen pay nga aglaklako ti narisgo nga ayayam para kadagiti ubbing.
Kabayatanna, nagpannawagan ni Antonio kadagiti nagannak a masapul a bagbaggaan dagiti annakda a saan a gumatgatang iti makadangran nga ayayam.
