LAOAG CITY – Inpakaammo ni Atty. Donato Balderas Jr., Schools Division Superintendent ti a naka-leave ti Principal iti Sta. Rosa National High School a ni Mr. Rocky Ballesteros kabayatan ti imbestigasion a maipagarup nga inpublikarna ti sensitibo a ladawan ti maysa nga estudiante a babai iti online.
Segun kenkuana, nakasaritana a personal ti Principal ken estudiante tapno mangngegan ti takder iti agsinnungbangir a partido.
Nupay kasta, saanen nga inbuksilan pay ni Atty. Balderas ti naan-anay a detalye tapno saan a maapektaran ti panagtaray ti imbestigasion.
Inlawlawagna nga administrative remedy pay laeng ti naaramidanda gapu ta awan pay ti pormal a reklamo a naawat ti opisinada.
Inpettengna nga adda ti karbengan ti maseknan nga estudiante nga agipila ti reklamo kontra iti Principal.
Kunana a patas ken objective ti aramiden ti Department of Education – Ilocos Norte tapno maammoan no asino ti pudno a naglabsing kadakuada.
Innayonna nga agtultuloy met a sumsumrek iti pagadalan ti nasao nga estudiante.
Maipalagip a dimmatag a mismo ti Principal iti istasion ti Bombo Radyo Laoag tapno ipakaammo a na-hack ti online account-na iti aldaw ti Sabado, Hulio 25.
Immuna iti daytoy, apaman a simrek ti Principal iti aldaw ti Lunes ket ditoy nga adda ti nangipakaammo kenkuana nga adda ti naikabil iti story-na a sensitibo a ladawan.
