LAOAG CITY – Linawlawagan ni Mrs. Marilou Alabanza, Principal II ti Santiago Elementary School iti ili ti Solsona ti reklamo mainaig iti 200 a pisos a ticket ken 200 a base vote para iti White Christmas ken ti elegasyon nga idi nagtugaw kas principal ket adon dagiti mabaybayadan.
Segun kenni Alabanza, ti ticket a mailako ket 200 a pidaso saan ket a 200 a pisos ken ti husto a balor na ket 99 a sentimos ti maysa a ticket.
Inpetteng na a ti maukkon a kwarta ket para iti kalikagom da a pannaka-semento wenno pannakaipangato ti basar ti entablado da.
Inbatad na a napagtutulagan a kada PTA paying parent ket mangala ti ilako na ken saan a mapilit dagiti saan na a kayat ti mangala.
Kabayatanna, naglikudan ni Alabanza ti alegasyon nga adon dagiti mabaybayadan sipud nagtugaw isuna kas principal iti nasao nga ili.
Kunana a ti kalikagom da a mangaramid ti sabali a wagas no adda ti proyekto nga aramiden da tapno maliklikan ti panagkontribusyon dagiti nagannak.
Innayon na a dagiti laeng nainkalintegan a mabayadan ti panag-pagpakontribusyon da kas iti Red Cross, Boy Scout ken Girl Scout.
