LAOAG CITY – Inadmitir ni Priscilla Meirelles a nagsinadan iti aktor a ni John Estrada ken naan-anayen nga inrikepna ti posibilidad a panagsinnubliananda.
Inbatad ni Priscilla, isuna mismo ti timmalaw iti pagtaenganda kaduana ti anakda a ni Anechka.
Inlawlawagna nga uray kasarda iti linteg ket nabayagen a saanda nga agdendenna nga agasawa.
Kunana a namin-adu a daras a pinadas ni John a makisinnublian kenkuana ngem saanen nga interesado isuna.
Innayon ti dati a Brazilian beauty queen a nabayagen a nagtepteppel daytoy kabayatan ti panagdennada.
