LAOAG CITY – Nakagun-od ti positibo a reaksyon manipod iti ado a lider ti nagduduma a pagilyan iti napasamak a kadakkelan a prisoner’s swap iti naggbaetan Estados Unidos ken Russia.
Ti pakasaritaan a prisoners swap ket pakairamanan ti pannakawaya-waya ti 24 a detainees manipod iti Russa.
Karaman kadagiti nawaya-wayaan ket da American journalist Evan Gershkovich ken dati nga US Marine Paul Whelan.
Ni Gershkovich ket natiliw kalpasan a naakusaran nga espiya ti CIA idinto a ni Whelan ket adda ti nakariri na a pulis iti Russia ken maipagarop a pinangtaan na ti biagna.
Ti pakabuklan a 24 a balud ket naibalud iti Russia ken Belarus.
Immunan a nagyaman ni US President Joe Biden kadagiti kaalyado da a pagilyan tapno naaan-anay a maipatungpal ti prisoners swap.
Kadwa ni Biden iti White House ti sumagmamano a kabagyan ken kameng ti pamilya dagiti nawaya-wayaan a balud manipod iti Russia nga isuda Evan Gershkovich, Paul Whelan, Alsu Kurmasheva ken Vladimir Kara-Murza.
Maipalagip a ti agtawen ti 47 a Russian-American Journalist a ni Kumasheva ket nasentensyaan ti innem ken kagudua ti tawen a pannakabalud gapu iti maipagarop a panagiwaras na ti negatibo nga impormasyon kontra iti Russian army.
Kasukat dagiti nawaya-wayaan nga Americans ket winaya-wayaan met ti Estados Unidos dagiti Russian dissidents ken dati ngaa FSB colonel a nasentensyaan ti kaso a murder ken sumagmamano nga indibidwal a naakusaran nga ispiya ken karaman iti cybercrime.
Inbatad ni Biden nga agtultuloy ti ar-aramiden da a panangipaay ti ballaag kadagiti kailian da nga agannad iti panagbiyahe kadagiti delikado a pagilian.
Binabalaw met ni Biden ni dati nga US President Donald Trump gapu ta saanna a naaramid ti prisoners swap idi isuna ti nakatugaw iti puwesto.
