LAOAG CITY – Nag-emergency landing ti maysa nga helicopter iti tengnga ti taltalon iti paset ti Barangay Gabut Sur iti ili ti Badoc.
Segun kenni Police Major Darwin Ocon, ti Asst. Chief ti Aviation Security Unit 1, nakalugan iti private chopper nga addaan ti body number nga RP-C2985 ket ti maysa a piloto, maysa nga Asst. crew ken dua a pasaheros.
Inlawlawag na a tichopper ket agdisso kuma iti Laoag International Airport manipud iti Manila ngem gapo iti mechanical problem ket nagdesisyon ti pilot nga ag-emergency landing.
Inbatad ni Ocon a natalged met amin dagiti nakalugan iti chopper ken dagus a nagresponde dagiti kameng ti pulisya.
Kalpasan ti panag-emergency landing ti chopper, dagus nga adda ti nagrescue a maysa pay a chopper pakairamanan ti aircraft mechanic.
Agpapan maisursurat ti damag, manarimaan ti panangkita ti aircraft mechanic ti nasao a chopper idinto a dagiti dua a pasaheros ket inasistiran dagiti kameng ti pulisya iti panagturong da ditoy ciudad.
Kabayatanna, nagayaman ni Ocon gapo ta awan ti napasamak a madi kadagiti amin a nakalugan iti chopper.
