LAOAG CITY – Bumasbassiten ti produkto a bawang ditoy probinsia gapu iti lumaklaka a presiona.
Daytoy ti rason no apay a kalikagum ni Gov. Matthew Marcos Manotoc nga adda ti addang ti probinsia mainaig iti daytoy a banag.
Inbatadna a maawatanna ti gagem ti gobierno nasional iti panangipalubosda iti panagangkat ti produkto agrikultura tapno malakaan dagiti aggatgatang ngem dagiti mannalon ti agsagaba ti saan a nasayaat nga epektona.
Gapu iti daytoy, kunana a masapol ti ad-adu a produksion.
Inlawlawagna a nasken a sakbay pay nga agmula dagiti mannalon ket addan dagiti nabirukan a gumatang kadagiti produkto ken mapagtutulaganen ti presio.
Innayonna a masapol a masigurado met a dekalidad ti produkto babaen ti pannakausar ti kabaroanan a teknolohia.
Kabayatanna, inpakaammona a masapol ti naan-anay ken agtultuloy a komprehensibo a suporta.
