LAOAG CITY – Inpetteng ti House prosecution panel iti impeachment trial ni Vice President Sara Duterte a mailabsing iti konstitusyon no dagus nga ibasura ti senado ti articles of impeachment nga awan ti maisayangkat a trial.
Daytoy ket kalpasan a kiniddaw ti bise presidente iti impeachment court nga ibasura ti kaso gapu iti maipagarop a pannakapaay a nangipaay dagiti naikeddeng a rekisito ti Konstitusyon.
Segun kada House prosecutors Leila de Lima ken Chel Diokno, obligasyon ti Senado a denggen dagiti ebidensya ken mangiparuk-at ti desisyon maibasar iti panangusig, isut gapuna a maibilang a nasapa pay wenno premature ti dagus a pannakaibasura ti kaso.
Kabayatanna, inbatad ni De Lima a naiget ti panangkontra da ti aniaman a mosyon nga ipila tapno ipabasura ti impeachment case sakbay ti pannakausig ti bise presidente.
Maipalagip nga iti umuna nga impeachment case kontra ken ni Vice President Duterte idi 2025, nagpila ni Senador Robin Padilla, a kaalyado ti bise presidente, ti resolusyon a gagem na nga ipabasura ti kaso sakbay pay a nabukel ti impeachment court.
