LAOAG CITY – Manamnama nga adda ti maiwayat a prosesion ti replica ti Black Nazarene ditoy siudad ti Laoag.
Segun ken ni Mrs. Minda Jacinto, akin-kukuan ti replica ti Black nazarene, sipud idi rabii ti Enero 8, 2025 ket adda ti naiwayat a misa iti Brgy. 2 Sta. Joaquina para kadagiti deboto ditoy probinsia.
Innayonna a manamnama nga adda ti maangay a misa iti ala-una ti malem ita nga aldaw Enero 9, 2025 ken ado dagiti makipaset manipud iti kabangibang a probinsia.
Kinunana a maiwayat ti procession wenno libot iti oras ti alas-tres ti malem, mangrugi iti Brgy. 2 ditoy siudad ti Laoag nga agturong iti Agbayani Street, P. Gomez Street, Bacarra Road, Kapitolio Probinsial no sadinno adda ti maiwayat a panagkararag ken adda ti naistablisar nga altar idinto nga agturong da iti Laoag City Hall ken adda met ti nakaistablisar nga altar, Topaz Street, Panganiban Street, Rizal Street, Agbayani Street nga agsubli iti Brgy. 2 Sta. Joaquina ditoy siudad ti Laoag.
Inbatadna a manamnama nga agleppas ti prosision iti oras ti alas-5 ti malem.
Kabayatana, nakasagana dagiti kameng ti Philippine National Police – Traffic Division ditoy siudad ti Laoag a mangbayabay kadagiti makapaset ti prosision tapnu maliklikan ti ania man nga insidente.
