LAOAG CITY – Dimmatag ni Mrs. Norma Lagmay, Provincial Agriculturist iti Sangguniang Panlalawigan kabayatan ti pannakadingngeg ti kaso administratibo ni Dumalneg Vice Mayor Francis Espiritu.
Kinumpirmaran ni Lagmay nga inikkanna ti dokumento nga Essential Goods Agriculture pass ni Mr. Froilan Suniga idi Abril kas mangipaneknek a mabalin daytoy nga agibyahe ti essential goods.
Segun kenni Lagmay, binagaanna ni Suniga nga agipasa kadagiti dokumento kas requirement tapno makaala daytoy ti food pass.
Inbatadna a nangisubmitir ni Suniga ti Business Permit, OR/CR ti lugan nga usaren nga agideliver ti goods ken ID.
Inpasingked ni Lagmay nga amin nga agrifishery stakeholder ket saan a mabalin a mapawilan nga agibyahe ti essential goods tapno masigurado ti food security kas maibasar iti Memorandum Circular 7 ken 9.
Kunana a sakop ni Suniga iti nadakamat a pammilin agsipod ta maibilang isuna a rice trader.
Kabayatanna, saan met a nakaatendar ni Cheryll Ballesteros ti MMMHMC iti hearing gapu ta nakamaternity leave daytoy.
Kiniddaw ni Atty. Cherry Bareng, Legal Counsel ni Suniga a mapatulodan ti subpoena dagiti sumaruno a testigo para iti sumaruno a hearing intono Oktubre 19.
