LAOAG CITY – Inlawlawag ni Police Colonel Frederick Obar, ti Provincial Director iti Ilocos Norte Police Provincial Office no apay agsasaruno dagiti maiwaywayat nga Anti-Illegal Drug Buy-bust Operation kadagiti nagduduma nga ili ken siudad ditoy probinsia.
Segun kenkuana, dagiti kangrunaan a matiltiliwda ket drug surrenderee wenno dagiti naggapu iti pagbaludan a naglabsing iti Republic Act No. 9165 wenno ti Comprehensive Dangerous Drugs Act of 2002.
Inbatadna a ti met laeng mangibutaktak kadakuada ket dagiti met laeng kakadua dagiti suspek nga agar-aramid iti iligal nga aktibidad a kalikagumda nga agbalbaliwen iti biag.
Kunana a ti kaudian a natiliwda iti operasion ket ti maibilang a Drug Group Leader a ni Ronnie Gamboa y Carlos, agtawen iti 31, naasawaan ken residente iti Brgy. Manalpac iti ili ti Solsona.
Maipalagip a natiliw ti suspek kalpasan a naglako daytoy ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Immuna iti daytoy, nakumpiskar pay manipud iti suspek ti tallo nga heat sealed transparent plastic sachet a naglaon ti maipagarup a shabu nga agdagsen ti sumurok-kumurang a walo a gramo ken agbalor ti 54,200 a pisos pakairamanan ti maysa a pedaso ti genuine 1 thousand peso bill ken siam a pedaso ti boodle 1 thousand peso bill a nausar kas buy-bust money.
