LAOAG CITY – Kalikagum ni Mr. Danny Daquioag, ti mangidadaulo ti Provincial Education Office a maipaayan met ti libre a mobile tablets dagiti agad-adal iti kolehio.
Daytoy ket kalpasan a makitana a saan laeng dagiti agad-adal ti elementarya ken sekondarya ti agkasapulan iti nasao a gadget.
No pay kasta, kuna ni Mr. Daquioag ket agkiddawto pay laeng daytoy kadagiti mabalin a mangidunar ti tablets para kadagiti kolehio nangruna ket dagitoy ti kangrunaan a dumaldalan ti online class gapu iti pangta ti COVID-19 pandemic.
Babaen iti daytoy, inbatadna a dakkel a katulungan kadagiti estudiante para iti al-alisto a panagsukisokda kadagiti maiyus-uswat a research no bilang maipatungpal daytoy a banag.
Innayon ti mangidadaulo ti Provincial Education Office a ti pundo dagiti tablets nga immunan a naibunong kadagiti agad-adal ti elementarya ken sekondarya ket para laeng iti Basic Education.
Maipalagip nga adda maysa a concern citizen ti nagkiddaw a dagiti koma kolehio ti maipangpangruna a maikkan ti tablets gapu ta dagitoy ti kangrunaan a dumaldalan ti online class.
