LAOAG CITY – Inlawlawag ni Ms. Elma Irapta, mangidadaulo ti Provincial Nutrition Action office ti rason iti panangiramanda kadagiti masikog nga indibidwal iti feeding programs ket tapno maipababa iti kaso ti stunting wenno bansot ditoy probinsiya.
Daytoy ti inrakurak na kalpasan a saanda laeng nga ilimitar kadagiti ubbing iti mabenepisyaran iti feeding program.
Inpetteng na a ti kapipintasan nga aramiden tapno malapdan iti panagbalin a bansot iti maysa nga indibidwal ket babaen iti panangirugi iti panangipaay iti naananay nga nutrisyon kabayatan nga adda pay laeng iti uneg ti buksit ti maladaga.
Kunana a babaen iti feeding program nga iwayat iti opisina da ket maprebentaran daytoy a mapasamak.
Inpakaamona a nu maiyanak ti maysa nga ubing a bansot, ket awanen iti maaramidan tapno masolusyonan daytoy.
Innayon a mabalin pay a mangilikliy daytoy kadagiti posible a risgo a mapasaran ti maysa a tao kabayatan iti panagsikog na.
Manamnama nga umbaot iti nasurok 200 a masikog dtoy probinsiya iti mabenepisyaran iti nasao a feeding prgram
Maipalagip nga idi tawen 2023, umabot ti 4.6% iti bilang dagiti adaan stunting ditoy probinsiya, kaaduan kadagitoy ket manipod iti ili ti Paoay, Pinili, Currimao, Dingras, ken Bacarra.
