LAOAG CITY – Nangilungalong ni Mr. Aianree Raquel, Provincial Tourism Officer ti tallo a banag para iti ad-adda pay a pannakapapintas ti turismo ditoy probinsia kadagiti delegado manipud iti Hawaii kabayatan ti 2nd Sister Province Business Symposium.
Segun kenkuana, umuna ti Retirement Destination Development no sadinno a rinibu nga Ilokano dagiti agar-arapaap a maki-reconnect-da kadagiti pamiliada isu a napintas no adda ti ma-develop a lugar a mabalin a pagliwliwaanda.
Malaksid iti daytoy, ti maikadua ket kalikagum ni Raquel nga adda ti panagsisinnukat ti talento ken ideya kas kadagiti maipatakder nga imprastraktura a mamati isuna a dakkel a tulong ti talento dagiti tattao iti Hawaii pakairamanan ti pannakapapintas ti ekonomia.
Kunana a ti maudi ket ti pannakapreserbar ken ad-adda pay a pannakaiyam-ammo ti nakadawyan ken kultura ti pagilian ken ti probinsia babaen kadagiti nagduduma nga aktibidad kas ti tinawen a maisaysayangkat a Tan-ok ni Ilokano Festival.
Kabayatanna, naammoan a sakbay ti COVID-19 pandemic, dumanon iti 3.5 a milyon a turista ti nairekord a bimmisita ditoy probinsia ken sumurok lima a ribu dagiti naokuparan a tourist destination wenno adda ti 125% a panagngato ti bilang dagiti turista.
