Prov’l Dir. ti PNP ti Ilocos Norte, nagpalagip kadagiti Chief of Police
LAOAG CITY – Pinalagipan ni P/Sr/Supt. Cesar Pasiwen Prov’l Dir. ti PNP ti Ilocos Norte dagiti amin a Chief of Police iti interemente a probinsiya.
Daytoy ket pakaseknan iti pannaka-recall dagiti amin a kameng ti PNP a nai-detail kadagiti amin nga opisyal ti gobyerno.
Segun ken ni Pasiwen, naiget ti pamilin manipud iti kangatuan a sangay ti PNP nga awan ti pulis nga agbalin a security ti siasinnuman nga opisyal wenno pulitiko.
Mainaig iti daytoy, kiniddaw ni Pasiwen kadagiti umili a no adda makitkita da pay laeng a pulis a sumursurot iti uray siasinno a pulitiko ket ipakaammo da laeng tapno maberipikar no adda pammalubos a sumurot daytoy.
Maipalagip a sipud nangrugi ti panagipilaan ti COC ket na-recall aminen dagiti pulis a naited kadagiti pulitiko a mangmangted iti seguridad kadagitoy gapu ta mausar ti serbisyo da iti umas-asideg a panagpipili.
