LAOAG CITY – Agtultuloy ti “psychiatric medicine assistance program” ti gobierno probinsial ti Ilocos Norte babaen iti Speak Up I’m Here.
Inbatad ni Mrs. Divine Sevilla, mangidadaulo ti Speak Up I’m Here, agtultuloy nga umad-adu dagiti manggungundaway niga uimili iti nadakamat a programa.
Mainaig iti daytoy, inbunannagna nga adda ti planoda a mangkiddaw a manayunan ti pundo para iti nasao a programa.
Inlawlawagna a malaksid kadagiti agpatpatulong iti nasao a programa ket adda pay dagiti klienteda nga agkasapulan ti “medical intervention”.
Kunana a kas psychological first aider, no madlawanda nga agkasapulan dagitoy ti medical a pannakataming ket iyasidegda dagitoy iti Mariano Marcos Memorial Hospital and Medical Center Acute Psychiatric Unit.
Kabayatanna, inpakaammo ni Sevilla nga agtultuloy pay nga adda dagiti agtawtawag, agte-text ken dagiti agturturong a mismo iti opisinada tapno agpabalakad.
Inpalgakna a manipud idi bulan ti Enero agingga idi Hunio kinse ket addan ti dua gasut uppat a pulo ket tallo a nagbalin a klienteda.
Segun kenkuana, maibilang ditoy ti 67 a lallaki, 174 a babbai ken dua a sabali pay.
Innayonna a dagitoy ket naggapo iti nagdumaduma a paset ti probinsia ken manipud iti kabangibang a probinsia.
