LAOAG CITY – Naglikudan ni Mr. Rommel Hilario, ti Presidente iti Parent-Teacher Association (PTA) iti Sarrat National High School iti ili ti Sarrat ti reklamo a naidanun it Bombo Radyo Laoag.
Daytoy ket mainaig ti maipagarop a mandatory a panagsingir da ti 5 ribo a pisos a quota para iti popularity contest ti kada section wenno classroom ti nasao a pagadalan.
Rumrumuar a ti maukkon ket mausar a pagpatakder da ti kantina iti nasao a pagadalan.
Inpetteng ni Hilario a saan a mandatory ti panagsingir da no di ket boluntaryo laeng.
Innayon na nga awan ti nadakdakamat da a quota idi nagtataripnong da ken mabalin a saan a naawatan ti nagreklamo ti nailanad iti Guidelines ti Omnibus Operations ti Parent-Teacher Association.
Inlawlawag na a naipalaon iti omnibus guidelines a dagiti section nga addaan ti kandidato a makaukkon ti nangatngatoo ngem 5 ribo a pisos ket maikkan ti gunguna basar iti ma-compute da iti sobra ti nasao a kantidad.
Innayon na a nailanad pay iti omnibus guidelines a mabalin da ti mangiyuswat ti fund raising agingga iti mamin-uppat a daras.
Inpasingked ni Hilario nga amin dagiti nagbalin ng addang da ket maiyataday iti omnibus guidelines ti Parent-Teacher Association.
Mainaig iti daytoy, inpakaammo ni Hilario a ti plano da nga ipatakder nga istraktura ket saan laeng a gagangay a kantina no di ket mapagbalin to pay a laboratoryo dagiti agad-adal.
