LAOAG CITY – Mangiyuswat ti Pugad Lawin ti ECORIDE 2024 iti Brgy. 25, Tamdagan iti ili ti Vintar inton Agosto 18.
Segun ken ni Engr. Neil Jose, dati a National President ti Pugad Lawin, tumulongda nga agmula kadagiti tarikayo kadagiti kabambantayan kas ti fruit bearing trees pakairamanan ti kasoy, santol ken rambutan.
Inbatadna nga iti kallabes ket napanda nagmula ti bakawan iti ili ti Solsona, Pasuquin ken Burgos.
Inlawlawagna a ti bakawan ket isu ti mangsalbar kadagiti umili manipud kadagiti dadakkel a dalluyong kadagiti kabaybayan no adda ti sumangbay a bagyo.
Kunana a napintas daytoy a programada gapu ta kalpasan ti 25 a tawen ket addanto ti apiten dagiti sumaruno nga henerasion.
Mainaig iti daytoy, napalaos ti panagyaman ni Jose ken ni Gob. Matthew Marcos Manotoc gapu ta babaen kenkuana ket naipalubos ti pannakaited dagiti naruay a seedlings kadakuada manipud iti Department of the Environment and Natural Resources ken Environment and Natural Resources Office.
Innayonna a ti assembly time-da ket 5:30 ti bigat ken tumalawda agarup alas siete ti bigat manipud iti Kapitolio Probinsial nga agturong iti ili ti Bacarra, sentro ti Vintar agingga a makadanonda ti venue.
