LAOAG CITY – Inkari ni Presidente Ferdinand Marcos Jr. a nayonan ti gobierno ti pundo ti Socio-Civic Projects Fund (SCPF) inton 2027 no nagbalin a naurnos ti panangipatungpal ti programa.
Segun iti Presidente, gagem ti gobierno a direkta a marikna dagiti barangay ti tulong ti estado nangruna kadagiti kangrunaan a proyekto ken kasapulan dagiti residente.
Ginudua ti pundo iti dua a paset no sadinno a ₱100,000 ti ilatang para kadagiti prioridad a proyekto ti barangay kas ti streetlights, kagamitan iti opisina, serbisio pampubliko ken disaster response.
Ti nabatbati a ₱100,000 ket naiyalokar iti lima a Bagong Pilipinas scholars iti kada barangay a makaawat ti sag-₱20,000.
Basar iti datos ti gobierno, umaboten iti 7,933 a barangay iti intero a pagilian ti naipaayan ti ayuda iti babaen ti programa nga addaan ti pakabuklan a pundo a ₱1.59 bilyon.
