LAOAG CITY – Nagpalagip ni Mr. Christoper King Medina, Disability Affairs Officer 4 ti Persons with Disability Affairs Office ditoy ciudad ti Laoag kadagiti establishimiento nga iberipikar a nasayaat dagiti Identification Card dagiti Persons With Disability.
Daytoy ket tapno masigurado a saan a peke dagiti Identification Card nga ig-iggaman dagiti addaan ti rangkap ti bagina.
Segun kenni Medina, alisto laengen a matulad dagiti Identification Card iti agdama isut gapuna a kasapulan ti naan-anay a pannagannad ken panangtingiting a naimbag kadagitoy.
Inbatad na a ti kapintasan nga aramiden para iti security measure ti Identification Card dagiti addaan ti rangkap ti bagina ket ti panangberipikar daytoy babaen iti link a DOH.GOV.COM .
Inlawlawag na a ditoy a makita no peke wenno saan ti Identification Card nga iggem ti maysa a Person with Disability.
Kanayatanna, kuna ni Medina a no adda dagiti maduktalan a peke nga Identification Card ket saan a nga husgaran a dagus ti maseknan.
Inkalintegan na nga agpapan ita ket adda dagiti saan pay a naiparehistro nga Identification Card gapu ta no dadduma ket adda iti panag-shutdown ti sistema.
Innayon na a dagiti Identification Card dagiti Persons with Disability ket ag-expired iti kada lima a tawen.
