LAOAG CITY – Pinabettak ti fighter jets ti Qatar ti Iranian bombers nga agturong koma iti United States airbase.
Basar iti Qatari military, napaspasda a nalappedan ti bomber ti Iran nga agturong koma tapno bombaen ti al-Udeid ti kadakkelan nga United States military base idiay Qatar.
Nalappedan ti air defenses ti Abu Dhabi dagiti umasideg a missiles ken drones manipud idiay Iran.
Inbatad ti ministry of defense a ti napigsa a panagbettak a nangngeg dagiti residene ket resulta ti pananglapped ti Air Defense Systems-da kadagiti missiles ken drones.
Umabot iti 1,230 ti natay iti Iran sipud inwayat ti Israel ken Estados Unidos ti panangatake daytoy idi Sabado.
Ti nasao a bilang ket naartapannan ti naipadamag a 1,190 a pimmusay idi immuna a rinaot ti Estados Unidos ken Israel ti Iran idi Hunio iti napalabas a tawen.
Ipayal-alisto ti United Kingdom ti pannakaibakwit dagiti kailianda a maap-apektaran iti gubat iti Middle East.
Inbatad ni British Prime Minister Keir Starmer nga addan dagiti chartered flights-da nga innala tapno mapaalisto ti panangibakwit.
