LAOAG CITY – Umanamong dagiti lider ti Quad Committee ti Kamara de Representantes nga ibaklay amin ti magastos iti pamasahe ken akomodasyon ni dati a Presidente Rodrigo Duterte agatendar laeng daytoy iti panagdengngeg mainaig kadagiti kaso ti extrajudicial killing iti war on drugs campaign na.
Nakasagana nga agbibingay da Quad Committee overall chair Robert Ace Barbers, ken dagiti co-chairman a da Dan Fernandez, Bienvenido “Benny” Abante Jr., ken Joseph Stephen “Caraps” Paduano, vice chair Romeo Acop, Senior Deputy Speaker Aurelio “Dong” Gonzales Jr., ken Deputy Speaker David “Jay-jay” Suarez tapno saan nga agbalin a lapped ti magastos iti panagatendar ni Duterte iti panagdengngeg.
Iti napalabas nga interview, inbatad ni Duterte nga awan ti gastusen na isut gapuna a saan a nakaatendar iti panagdengngeg ti Quad Committee.
Ti saan a panagatendar ni Duterte ket nakaupayan dagiti kongresista kas kada Majority Leader Manuel Jose “Mannix” M. Dalipe, House Assistant Majority Leaders Jay Khonghun ti Zambales ken Paolo Ortega ti La Union, a nangibaga a mabuteng ni Duterte kadagiti saludsud kenkuana isut gapuna a saan a napan nagatendar.
Inpalgak pay ni Paduano, chairman ti Committee on Public Accounts a mabalin nga intensyonal ti saan a panagatendar ni Duterte.
Inpaganetget dagiti lider ti Quad Committee a seryoso da nga agsaludsud ken Duterte tapno maamoan ti kinapudno.
