LAOAG CITY – Saan a pabor ni Mr. J’Mc Ray Teodoro, Presidente ti Quarry Association ditoy probinsia ti lungalong ti Sangguniang Panlalawigan a pagbalinen a mandatory requirement ti endorsement manipod iti junta probinsyal tapnu makaala da ti permit gapu iti posibilidad a maibayag laeng ti proseso.
Segun ken Teodoro, iti agdama ket kasapulan laeng iti dua nga endorsement manipod iti Sangguniang Panlalawigan, Barangay Resolution, wenno ti Municipal Resolution.
Inlawlawag ni Teodoro a no saan a makaala ti quarry permittee iti barangay resolution wenno iti Municipal resolution, adda iti option dagitoy nga agturong iti Sangguniang Panlalawigan para iti endorsement-da.
Kabayatanna, kuna ni Teodoro nga adda iti Provincial Mining Board a mangtingiting kadagiti requirement wenno dokumento dagitoy sakbay a mapalubusan da iti aktibidad, isut gapuna nga awan iti rumbeng a pagdanagan ti Sangguniang Panlalawigan kadagiti possible nga agtaud nga anomalya seknan iti operasyon gapu ta istrikto iti panagisyu dagitoy ti permit.
Nupay kasta, inbatad ni Teodoro ti naan-anay a suporta na iti kalikagum ti junta probinsyal a manayunan ti mapastrek iti probinsia babaen iti quarry operation.
Kabayatanna, kuna ni Bokal Rafael Medina a kasapulan a pagbalinen a mandatory iti endorsement ti Sang Panlalawigan gapu daytoy ti mangbalanse ti executive ken legislative.
Innayon na a no dumalan paylaeng daytoy iti Sang panlalawigan ket maprotektaran da ti gobernador manipod kadagiti reklamo a possible a tumaod.
Inbatad ni Medina a ti laeng kalikagum da ket iti pannakaipangato ti revenue wenno mapaspastrek ti probinsia ken ad-adu pay a serbisio ti maipaay kadagiti umili.
