LAOAG CITY – Ibilang ni Ms. Cathy Estavillo, pannakangiwat ti Bantay Bigas nga ulbod ti nagbalin a rakurak ni Presidente Ferdinand Marcos Jr. a saan a naapektaran dagiti mannalon iti pannakaipatungpal ti P20 iti kada kilo ti bagas kagiddan ti maikapat nga State of the Nation Address wenno SONA-na.
Segun kenkuana, apaman a nairubuat ti nasao a programa ket insigida a bimmaba ti farmgate price ti irik dagiti mannalon.
Inbatadna a saan a marikna dagiti mannalon ti panawaganda iti Presidente a maipangato ti presio iti pannakagatang dagiti irik dagitoy.
Kunana a saan nga epektibo ti pannakaipatungpal ti P20 iti kada kilo ti bagas gapu ta mapili met dagiti gumatang ken mabenepisiaran iti daytoy.
Inlawlawagna a kaaduan kadagiti dinakamat ni Presidente Marcos maipapan kadagiti tulong a maipaay kadagiti mannalon ket agtaltalinaed laeng a kari kadakuada.
Mainaig iti daytoy, kwinestionaran ni Estavillo ti plano ti Presidente a masapul a papigsaen nga umuna ti produksion iti agrikultura sakbay a mangipasdek kadagiti Kadiwa Stores.
Inpalgakna a masapul a maipababa ti presio ti bagas kadagiti merkado publiko idinto a nasken a maipangato ti presio ti pannakagatang ti irik dagiti mannalon.
Innayonna a kaaduan kadagiti maap-aprobaran a linteg ket saan mabenbenepisiaran dagiti gagangay laeng a Pilipino no diket para kadagiti negosiante ken dagiti foreign investors.
Kabayatanna, inikkan ti pannakangiwat ti Bantay Bigas ti bagsak a grado iti maikapat nga State of the Nation Address wenno SONA ni Pres. Marcos gapu ta saan a matungtungpal dagiti ikarkarina kadagiti Pilipino.
