LAOAG CITY – Saan a maibilang a panagayat ti maysa a kabsat ti inaramid ni Senadora Imee Marcos kontra ken ni Presidente Ferdinand Marcos Jr. nangruna ket awan ti nalawag a pangibasaran ti pammabasol.
Daytoy ti rakurak ti Malacañang kagiddan ti akusasion ti Senadora a maipagarup nga agus-usar ti iligal a droga ti Presidente sipod pay idi agtutubo daytoy.
Inbatad ni Palace Press Officer Claire Castro, nalawag a pammerperdi laeng ti inaramid ti Senadora ken saan a maibilang a panangisakit ti maysa a kabsat.
Inlawlawagna nga imposible nga adda ti isyu iti salun-at ti Presidente aglalo ket naaramidna nga agidonar ti kidney iti amana, maysa a banag a saan a maaramid ti maysa a tao nga adda ti diperensiana iti salun-at.
Inpetteng pay ni Castro, arig ad-adda pay a protprotektaran ti Senadora dagiti personalidad a karaman iti isyu ti korapsion ngem iti mismo a kabsatna a mangilunglungalong kadagiti imbestigasion tapno labanan ti anomalya iti gobierno.
