LAOAG CITY – Patien ni Atty. Alipio Castillo, ti Provincial Comelec Officer ditoy probinsya a negatibo ti epekto na kadagiti opisyal wenno kandidato, tattao, ken uray iti opisina da ti nagbalin a rakurak ni Vice President Leni Robredo.
Immunan nga inrakurak ti bise presidente nga awaten latta dagiti tattao ti ibunong dagiti pulitiko a kwarta ngem agbotos babaen iti konsensya.
Inpetteng ni Castillo a saan a napintas a denggen a daytoy a lungalong ket naggapo a mismo iti nangato nga opisyal ken kandidato pay iti 2022 elections.
Kuna na a no ordinaryo a tao ti nagsao ket nalaglag-an laeng a denggen.
Innayon na a no kastoy ti ibagbaga ti nangato nga opisyal ti gobierno ket maperdi ti kredibilidad ti Comelec, dagiti kandidato ken uray dagiti tattao a mismo.
