LAOAG CITY – Inpetteng ni Palace Press Officer Undersecretary Claire Castro nga awan ti pagibasaran dagiti rakurak ni Vice President Sara Duterte a maipagarop a supsuportaran ni Presidente Ferdinand Marcos Jr. ti International Criminal Court (ICC) kontra ken ni dati a Presidente Rodrigo Duterte.
Segun ken ni Castro, possible a resulta laeng ti pannakadismaya ti bise presidente dagiti nagbalin a rakurak na gapu ta manarimaan ti pannakausig ti ama na iti International Criminal Court.
Inpetteng na a dagiti kaso a naipila kontra iti dati a presidente ket nangrugi pay idi 2017, no sadinno nga iti dayta a panawen ket pribado nga umili paylaeng idi ni Presidente Marcos Jr.
Kuna ni Castro a tungtungpalen laeng ti presidente ti maipatpatungpal a linteg ken saan nga isuna ti rumbeng a pabasolen iti sangsangwen a kaso ti dati a presidente.
Kabayatanna, inbatad ni Castro nga awan paylaeng ti panagbalbaliw iti posisyon ti administrasyon mainaig iti pannakikappeng manen ti Pilipinas iti International Criminal Court, gapu ta awan pay ti panagsasarita maipanggep iti daytoy.
