LAOAG CITY– Inpakaammo ni Police Major Joseph Tayaban, ti Hepe ti Philippine National Police iti ili ti Badoc nga adda ti nakita a rikki ti rangtay iti nagbedngan ti Brgy. La Virgen ken Brgy. Sta. Cruz iti nasao nga ili.
Segun kenni Tayaban, daytoy ket epekto ti napigsa a gingined ditoy probinsia idi rabii.
Inbatadna a gapu iti daytoy ket masapol a ti preventive measure kas koma iti saan a panangipalubos pay laeng ti heavy equipments wenno dadakkel a luglugan a dumalyasat iti nasao a rangtay.
Inlawlawag na nga iti agdama ket dagiti pay laeng nakamotorsiklo wenno light vehicles ti maipalubos a dumalyasat iti rangtay.
Kunana a naamak a dumalyasat kadagitoy a gundaway rason a masapol a maipakaammo daytoy a pasamak iti biang ti Municipal Engineering Office tapno ma-inspect a naimbag daytoy.
Inbagana a manarimaan pay laeng ti monitoring-da kadagiti amin a barbarangay tapno maammoan ti kasasaad dagiti umili ken dagiti pagtaengan wenno pasdek a mabalin a nadadael gapu iti gingined.
